Ծննդյան 125 ամյակը ԱՍԼԱՆ ԱՆՆԱ ՄԸՐԳԸՐՏԻ

Իսկական անունը՝  Ասլանյան Աննա Մկրտչի: Բժիշկ-ծերունաբան, ակադեմիկոս, Ռումինիայի գիտության վաստակավոր գործիչ:
Ծնվել է 1897 թ. հունվարի 1-ին, Ռումինիայի Բրըիլա քաղաքում:

1922 թ. ավարտել է Բուխարեստի համալսարանի բժշկական ֆակուլտետը:
1945 թ. արժանացել է պրոֆեսորի կոչման:
1945-48 թթ. աշխատել է Տիմիշոարա քաղաքի համալսարանի ներքին հիվանդությունների կլինիկայի պրոֆեսոր:
1948-52 թթ. եղել է Բուխարեստի ներզատաբանության ինստիտուտի ֆիզիոլոգիական կլինիկայի տնօրենը:

Այստեղ նա հետևելով ակադեմիկոս Պարհորնի տեսությանը,  ձեռնամուխ է եղել մարդու ծերությունը կանխող և կյանքը երկարացնող դեղի հայտնագործմանը:

Տևական պրպտումներից հետո, 1950 թ. ստեղծել է «Գերովիտալ H-3» պատրաստուկը, որը հրաշագործ արդյունքներ է ունեցել սկզբում կենդանիների, ապա մարդկանց վրա:

Պարզվել է, որ նրանով կարելի է մարդու կյանքը երկարաձգել մինչև 100 տարի, բուժել որոշ սրտային հիվանդություններ, հիշողության և ինտելեկտի թուլացումով ընթացող ուղեղի անոթների աթերոսկլերոզը, արյունազեղումներն ու պարալիչները, որոշ նյարդային հիվանդություններ, հոդաբորբեր, շաքարախտ և այլն:

1952 թ. Ռումինիայի կառավարության օժանդակությամբ Բուխարեստում հիմնել է Եվրոպայում միակ Կ. Պարհորնի անվ. Ծերունաբանության և ծարունաբուժության ինստիտուտը և եղել  տնօրենը:

1957 թ. Քարլսռուհե քաղաքում կայացած գիտաժողովում նա ներկայացել է իր հայտնագործության մասին պատմող մի փաստագրական  կինոնկարով ու դասախոսությամբ: Հայտնագործությունը ընդունվել է բուռն ծափահարություններով, իսկ աշխարհի մամուլն արձանագրել. «Աննա Ասլանը հաղթեց ծերությանը ... »:

Բացի  «Գերովիտալ H-3»-ից նա ստեղծել է նաև զառամախտը բուժող «Ասլավիտալ» և մանկական թուլամտությունը բուժող «Ասլավիտալ երեխաների համար» պատրաստուկները:

1959-88 թթ. եղել է Ռումինիայի Ծերունաբանների և ծերունաբույժների ընկերության նախագահը:

1960 թ. ամերիկացի հայտնի բժիշկ-գիտնական Հենրի Մարքսը նրա մասին գրել է «H-3-ը ընդդեմ ծերության» գիրքը:

Նրա կլինիկայում բուժման կուրս են անցել ռումին հայտնի մաթեմատիկոս Պյոտր Սոնցը, Շառլ Դը Գոլը, Դուայթ Էյզենհաուերը, Չարլզ Չապլինը, Էլիզաբեթ Թեյլորը և ուրիշներ:

Գիտական աշխատանքները վերաբերում են փորձառական, կլինիկական և սոցիալական ծերունաբանության հարցերին:
1961 թ. պաշտպանել է դոկտորական թեզ և ստացել բժշկագիտության դոկտորի գիտական աստիճան:

Նա դասախոսություններով հանդես է եկել բազմաթիվ երկրներում:

Նրա գիտական աշխատությունները լույս են տեսել աշխարհի շատ լեզուներով:

Եղել է բազմաթիվ երկրների ակադեմիաների և գիտական ընկերությունների անդամ:

1969 թ. ընտրվել է Ռումինիայի ՍՀ ԲԳԱ ակադեմիկոս:
1969 թ. ընտրվել է Նյու Յորքի ԳԱ ակադեմիկոս:
1971 թ. արժանացել է Ռումինիայի սոցիալիստական աշխատանքի հերոսի կոչման:
1971 թ. Իտալիայում նկարահանված «Մեր ժամանակի հռչակավոր կանայք» կինոֆիլմում ներկայացված է նաև Աննա Ասլանը:
1973 թ. արժանացել է Ռումինիայի ՍՀ վաստակավոր բժշկի կոչման:
1974 թ. ընտրվել է Ռումինիայի ՍՀ ԳԱ ակադեմիկոս:
1977 թ. արժանացել է Ռումինիայի ՍՀ գիտության վաստակավոր գործչի կոչման:
1982 թ. ընտրվել է ԽՍՀՄ Ծերունաբանների և ծարունաբույժների գիտական ընկերության պատվավոր անդամ:
1983 թ. Գերմանիայի ԴՀ-ում ստեղծվել է «Աննա Ասլանի անվան մրցանակ», որի առաջին դափնեկիրը դարձել է ինքը Աննա Ասլանը:
1984 թ. Իտալիայում  արժանացել է «Հաղթանակի արձան» մշակութային համաշխարհային մրցանակին:

Հանդիսանում է Ռումինիայում Ծերունաբանության և ծարունաբուժության դպրոցի հիմնադիրը:

Նրա անունը քանդակված է Հունաստանում գտնվող Հիպոկրատի մարմարյա հուշարձանին:

Նրա անձի և գործունեության մասին կա հարուստ գրականություն:

Մահացել է 1988 թ. մայիսի 20-ին, Բուխարեստում, 91 տարեկան հասակում:

Հարություն Մինասյան
հոգեբույժ

Հարցեր, պատասխաններ, մեկնաբանություններ